Instant Til Mava Roll

Makar Sakranti! Ek aisa tyohar, jo har ghar me bade hi utsaah se manaya jata hai. Aur is din ghar me Til ki mithai na bane, aisa to ho hi nahi sakta.

Aap sabne Til se bani koi na koi mithai to zaroor khayi hogi. Lekin aaj mai apke liye layi hu tasty & nutritious instant til mava roll recipe. 

Ye amazing til roll ki step by step recipe (photo ke sath) hai, Jise banana ekdum aasan hai. To chaliye banate hai Makar Sakranti Mithai Recipe.

Ingredients of Til Mava Roll

• Safaid Til (White Seasame) – 200 gm
• Milk Powder                         – 200 gm
• Cheene (Powdered Sugar)  – 200 gm
• Doodh (milk)                        – 250 gm
• Ilayachee (Cardemom)      – 5-6
• Dry Fruits (Chopped)           – according to choice
• Desi Ghee                            – 1 Tablespoon

Video Recipe Of Til Mava ROll

Method (How to make Til Mava Roll at home)

Nutritious Til Mava Roll mithai banane ke liye sabse pehle ek kadai ko pre-heat kare aur isme bina ghee dale, til dalkar 3-4 minute tak roast kar le. Halka bhun jane par inhe ek bowl me shift kar le. Thanda hone par thode til alag kar le aur baki ko mixi me dardara pees le.

Ab mava banane ke liye, kadai me doodh garam kare. Isme thoda-thoda karke milk powder add kare aur lagatar chalate rahe, taki isme lumps na bane. Ise dheeme aanch par tab tak pakate rahe, jab tak ki ye mave ke jaise gada na ho jaye. 

Gada hone par isme peese hue til aur cheene powder add kare aur 3-4 minute tak lagatar chalate hue bhun le. Ab isme chopped dry fruits aur ghee dalkar 2-minute tak bhun le. Taiyar mishran ko ek plate me nikal le aur thanda hone de.

Thoda thanda hone par iske roll bana le aur inpar til ki coating kar le. Ab inhe 30 minutes ke liye refrigerate kar le aur manchahe aakar me kat le. Aapke instant til mava roll ready hai. Inhe dry fruits se garnish karke serve kare.

Til Mava Roll Recipe (step by Step Photos ke sath)

Step 1. Ek kadai me til ko bina ghee dale, roast kare aur thanda hone par mixi me dardara pees le.

Step 2. Ab ek kadai me doodh garam kare. Ab isme ilayachee dale aur lagatar chalate hue thoda-thoda milk powder add kare.

Step 3. Doodh jab mave ki tarah gada ho jaye, to isme peese hue til aur cheene dalkar 3-4 minute bhun le.

Step 4. Ab is mishran me dry fruits aur ghee dalkar 2 minute tak bhun le.

Step 5. Taiyar mishran ko ek plate me shift kar le aur thanda hone par roll bana le.

Step 6. Taiyar rolls par til ki coating kar de aur 30 minute ke liye refrigerate kar le.

Step 7.  Rolls ko manchahe aakar me kat le aur nuts se garnish karke serve kare.

Pro Tips

1. Til mava roll ko jaldi banane ke liye aap step 2 me doodh ki jagah readymade mava le sakte hai.
2. Jyada tasty banane ke liye aap step 3 me cheene ki jagah gur (jagarry) bhi dal sakte hai.
3. Serve karte samay dry fruits se garnishing jaroor kare. 
4. Bacchon ko khilane ke liye aap step 4 me dry fruits ke sath tutti-fruity bhi add kare.

Asha karti hu ki aapko meri ye Til Mava Roll Recipe zaroor pasand aayi hogi. Gajar ki Kheer, Gajar ke Halwe aur Methi Gond Ladoo ki tarah ye til roll bhi sardi ke mausam me bahut labhkari hote hai. To aap bhi inhe ghar par zaroor try kare.

Also Try: Zero calories Mixed vegetable soup, 2 minute me Tandoori Roti, Hoel jaisi Dal Makhani ghar par, Cheese Chilli Recipe, etc.