Banaye Delicious Gajar ki Kheer 5 aasan steps me (Hindi Recipe)
Sardi ka mausam aur Gajar ki Kheer! Are wah! Naam sunte hi mu me pani aa gya. Ab sardi ka mausam ho aur gajar ki kheer ya halwe ka zikar na ho, aisa to ho hi nahi sakta. To chaliye phir khilate hain aapko, Gajar Ki Kheer.
Vaise aapne Gajar ka halwa to bahut banaya hoga, lekin aaj jo hum banayege wo hai “Gajar-Kheer Recipe” jise banana ekdum simple aur aasan hai. Sath hi ise banane ke liye jyada ingredients ki bhi zarurat nahi hai.
Swad – Iska swad ekdum meetha aur malaidar hota hai.
Serving method – Ise lunch ya dinner me mithai ya dessert ki tarah serve kar sakte hai.
Preparation Time – 20-25 minutes
Ingredients
Gajar- 400 gm (grade ki hui)
Ghee- 2 Tablespoon
Doodh- 500ml
Malai- 2 Tablespoon
Cheene – Swadanusar
Carrot Kher Recipe Video in Hindi
Gajar ki Kheer banane ki vidhi
Aaj hum apke liye laye hai Carrot Kheer Recipe in hindi. Aapne vaise to bahut bar gajar ki kheer khayi hogi, lekin yakeen maniye is tarike se banayi gayi gajar ki kheer apko aur apke parivar ko bahut hi swadisht lagegi aur yakinan aap iska swad bhula nahi payenge. To chaliye dekhte hai how to make Gajar Kheer.
Step1. Sabse pehle ek pan me ghee garam karke isme grade ki hui Gajar dale.
Step2. Gajar soft hone tak paka le aur isme malai dalkar ek minute tak bhun le.
Step3. Ab isme doodh dale. Ek ubal aane ke bad 3-4 minute tak dheme aanch par pakaye.
Step4. Ab isme cheene daale aur doodh gada hone tak 2-3 minute ubalne de.
Step5. Taiyar Kheer me nuts dalkar garma-garam serve kare.
Tips
- Agar apko jyada gadi kheer pasand hai, to step 4 me aap condensed milk dal sakte hai.
- Kheer ko creamy texture dene ke liye aap step 2 me khoya bhi add kar sakte hain.
- Kheer banane ke liye hamesha meethi gajar ka prayog kare ya iska peela bhag hata de.
- Kheer ko beech-beech me chalate rahe jisse yeh aur bhi swadisht banegi.
- Kheer ke taste ko badhane ke liye gajar ko ghee me acche se bhune.
Health benefits
Sardiyon ka anmol tohfa hai “Gajar” jo swad ke sath kai guno se bhi bharpur hoti hai. Isme Karotene, Potassium, Vitamin A aur E hota hai. Jisse ye hamari skin, hair aur anhkon ke liye bahut faydemand hoti hai.
Asha karti hu ki meri ye recipe aapko zaroor pasand aayegi. Aap ise ghar par try kare aur apne parivar ko iske anokhe swad aur sehat ka tohfa de. Yadi aapke koi sujhav ya query ho to unhe bhi comment karna na bhule.
You can also try my other recipies Methi Gond Ladoo Recipe, Hotel jaisi Cheese Chilli, Dal Makhani in 9 easy steps, 2 minute me Tandoori roti, Chole Bhature Recipe in hindi, Kadi Pakora Recipe , Aam Papad Recipe, Garmi ka rambaan Aam Panna, Mango Frooti Recipe, Rooh Afza Syrup Recipe and Low calorie Aloo bukhara Sharbat.
