15 Minute me Banaye Delicious Gajar ka Halwa (Recipe in Hindi)

Sardiyon ka mausam aur swadisht, garam aur makhmali gajar ka halwa! Aray! gajar ke halwe ki mithas se to mere mu me pani aa gya. Thand ke mausam me garam-garam gajar ka halwa khane ka ek alag hi maza hota hai.

Agar aap bhi meetha khane ke shokeen hain, to aaj hum aapke liye laye hai Winter special gajar ka halwa recipe. Jo khane me to tasty hai hi, sath me nutrition se bhi bharpur hai. Yahi kaaran hai ki thand me iski demand aur bhi badh jati hai.

Asal me gajar ka halwa bacchon se lekar bado tak sabhi ko pasand hota hai aur lagbhag har  ghar me banaya jata hai. Lekin kuch logo ko iski perfect recipe pata nahi hoti or is wajah se ve aksar market se gajar ka halwa khareed kar khate hain. 

Isiliye aaj main aap sab ke liye layi hu gajar ki kheer recipe ki tarah gajar ka halwa (recipe in hindi) banane ka sabse aasan tarika. To chaliye banate hai aaj ki special dish, Market jaisa gajar ka halwa ghar par. jise khakar sab khush ho jayenge.

Ingredients of Gajar ka Halwa Recipe

Gajar (Carrot) – 5 (Medium sized, Roughly chopped)

Malai (Cream) – 2 Tablespoon

Cheene (Sugar) – Acco. to taste

Doodh (Milk) – Half cup

Desi ghee – 3 Tablespoon

Ilayachee (Cardamom) – 2-3

Dry fruits – According to taste

Method (How to make Gajar Halwa at home)

Jhatpat gajar ka halwa banane ke liye sabse pehle ek cooker me 1 teaspoon ghee le aur isme ek-ek karke sabhi dryfruits roast kar le. Ab inhe ek bowl me nikal le aur isi ghee me ilayachee aur gajar dalkar 2 minute pakaye.

Ab isme doodh aur cheene dalkar, sim gas par 2-3 whistle aane de. Dhyan rahe hame gas ko medium ya full nahi karna hai, kyonki aisa karne se doodh aur cheene jal sakte hai. Ab pressure cooker thanda hone par, Mishran ko ek kadai me transfer kar le.

Kadai me gajar ko thoda-thoda mash kar le aur full gas par iska pani sukhne de. Ab isme 2 tablespoon ghee aur malai add kare aur bhunne de. 

Ek pan me half litre doodh boil kar le aur ubal aane par ise vinegar se phar le. Doodh ka chhaina (paneer) bankar taiyar ho jayega. 

Is paneer ko gajar ke halwe me dale. Ab isme roasted dry fruits aur ek tablespoon ghee add kare aur acche se bhun le. Swadisht gajar ka halwa taiyar hai. Dry fruits dalkar ise garam-garam serve kare. 

Gajar ka Halwa Recipe (Step by Step Photos ke Sath)

Step1. Gajar ka halwa recipe banane ke liye sabse pehle pressure cooker me ghee garam kare aur isme sabhi dry fruits roast karke ek bowl me nikal le.

Step2. Ab ghee me roughly chopped gajar aur ilayachee dalkar do minute tak paka le aur isme doodh aur cheene dalkar dheeme aanch par 2-3 whistle aane de.

Step3. Mishran ko ek kadai me shift kar le aur gajar ko maish kar le aur tez aanch par lagatar chalate hue iska pani sukne de.

Step4. Ab is halwe me 2 tablespoon ghee aur malai add kare aur bhunne de.

Step5. Ek pan me half litre doodh ka (vinegar dalkar) chhaina (paneer) bana le aur halwe me add kare.

Step6. Ab gajar ke halwe me roasted dry fruits aur thoda ghee dalkar bhun le.

Step7. Taiyar gajar ke halwe ko nuts se garnish kare aur garma-garam serve kare.

Pro Tips

1. Gajar ka halwa banane ke liye ekdum fresh, lal aur meethi gajar ka hi prayog kare.
2. Gajar ke halwe me full cream mik ka prayog kare, jisse yeh ekdum creamy aur soft banega.
3. Halwe ko lagatar chalate hue medium aanch par banaye. 
4. Superb taste ke liye halwe me ghee ki matra thodi jyada dale. 
5. Gajar ke halwe ko aur bhi swadisht banane ke liye ise acchi tarah se bhune.
6. Aap chhaine ki jagah isme khoya bhi dal sakte hai.
7. Yadi aap isme calories kam karna chahte hai to doodh, ghee or khoye ki matra kam kar sakte hai.
8. Sugar patients ke liye cheene ki jagah gur (Jaggary) ka prayog kare.

Health Benefits

1. Jaisa ki aap sab jante hai, carrot me bharpur matra me beta-carotene hota hai. Ye hamari skin ko UV rays se protect karta hai.
2. Carrots vitamin A ka ek badhiya source hai, jo hamari vision ko improve karta hai.
3. Gajar ke halwe me doodh ke prayog se yeh dish calcium aur protein guno se bharpur hoti hai.
4. Dry fruits add hone ke karan ye halwa hamari body ko protein aur antioxident provide karta hai.
5. Sardi me ghee hamare body aches aur pains ko reduce karne me helpful hota hai

Asha karti hu aap sabko meri ye winter special recipe jaroor pasand aayi hogi. To abse aap sab sardiyo me khud bhi guno se bharpur gajar ka halwa khaye aur dusro ko bhi jaroor khilaye.

Sardiyon me Til mawa roll, Gajar ki kheer aur Gond ladoo(Pinni) bhi gajar ke halwe ki tarah bahut faydemand hote hai. To aap inhe bhi jaroor banaye.

My other recipies: Restaurant style Cheese Chilly Recipe, Dal makhani in 9 easy steps, Tandoori Roti, Special Kadi Pakora Recipe, Punjabi style Ghiya Dal Chana Recipe, etc.