2 Minute Me Tandoori Roti(Hindi Recipe)

Tandoori Roti ek paramparik aur swadisht vyanjan hai. Yeh ek north Indian flatbread recipe hai, jise gehu ke aate ya maide ke sath banaya jata hai. Tandoori roti ko paramparic roop se tandoor par banaya jata hai.

Lekin aaj mai aapko bataungi ki kaise tandoor ke bina bhi hum hotel jaisi Tandoori Roti ghar per hi bana sakte hain aur wo bhi sirf 2 minute me. Roti ya Chapati ek aisi dish hai , jise hum roz khate hain par kabhi bor nahi hote.

Lekin kabhi kabhi jab tave ke bajay Tandoori Roti, Laccha Parantha ya Naan khane ka mann hota hai to hum hotel ki roti prefer karte hai. Par aaj hum hotel ki bajaye ghar par banayenge sirf 2 minute me dher sari Tandoori Roti.

Ingredients for Tandoori Roti

Aaiye dekhte hain ghar par tandoori roti banane ke liye hame kin-kin samagriyon ki jarurat hai.

2Cup Gehu ka Aata

½ Teaspoon Namak

2 Teaspoon Desi Ghee

5 Litre ka Cooker

Pani Jarurat ke anusar

Instructions

Tandoori roti cooker me banane ke liye sabse pehle aap gehu ka aata guth le . Aap chahe to isme thoda maida bhi mila sakte hai.Isse hamari roti dikhne me ekdum hotel jaisi hi lagegi.

Ab is aate ko kam se kam 15 minute ke liye dhak kar rakh de. 

Cooker ko pre heat kar le.

Aate ki loi lekar roti bel le. 

Roti ki ek side par pani lagakar cooker ke ander ki side laga de. 

Gas ko sim kar de.

Roti jab thodi sik jaaye to cooker ko ulta kar de aur ander se roti ko pakne de.

Ab chimte ki madad se roti utar le aur gas par thoda sek le. 

Taiyar Roti par ghee ya butter lagakar garam serve kare.

Simple Steps for Tandoori Roti

Step 1. Gas par cooker ko high flame par pre heat kar le.

Step2. Ab cooker ko ulta karke ander se bhi garam kar le.

Step 3. Itne me aap 4-5 roti bel le aur roti ki ek side par pani lagakar cooker me laga de.

Step 4. Do minute sekne ke bad, cooker ko ulta kar de, jisse roti ache se pak jayegi. 

Step 5. Apki roti ab uppar se sik chuki hai.

Step 6. Ab roti ko chimte hi help se utar le aur halka sa gas par sek le.

Step 7. Apki Tandoori Roti taiyar hai. Is par ghee ya butter laga kar garam serve kare.

To dekha aapne is tarah cooker me Hotel jaisi Tandoori Roti banana kitna aasan hai. Aap ek bar me 4-5 roti bana sakte hai. Jinhe sikne me sirf ek hi minute ka time lagega.

To ab bina kisi jhanjhat ke aur bahar jaye bina, kuch hi minto me dher sari tandoori roti aap apne parivar ke liye bana sakte hai.

To ab jab bhi aap ghar par Dal Makhani ya Cheese ki koi special dish banaye to sath me Cooker me Tandoori Roti jarur banaye. 

Tips For Making it more Easy and Tasty

1. Laccha Parantha/Tandoori roti ko chatpata banane ke liye aap ise balte samay sukha pudina, garam masala ya chat masala bhi dal sakte hai. Jisse Roti ka taste or bhi badhiya ho jayega.
2. Roti ko belte samay jyada patla na bele. Ise thoda mota bele ya phir aap ise hath se faila kar bhi bana sakte hai.
3. Roti sekte samay beech-beech me cooker ko ghumate rahe taki roti acchi tarah se sik jaaye.

Asha karti hu ki aap sabko meri ye recipe bahut pasand aayi hogi. Aap ise ghar par jaroor try karen aur hotel jaisi garam, naram aur kurkuri tandoori roti ka ghar baithe maza le. Aur ha mujhe comment kar ke jaroor bataye ki aapko meri ye recipe kaisi lagi. Dhanyawaad!